کسی صورت سحر نہیں ہوتی

کسی صورت سحر نہیں ہوتی
رات اِدھر سے اُدھر نہیں ہوتی

خوفِ صیّاد ہے نہ برق کا ڈر
بات یہ اپنے  گھر نہیں ہوتی

ایک وہ ہیں کہ روز آتے ہیں
ایک ہم ہیں خبر نہیں ہوتی

اب میں سمجھا ہوں کاٹ کر شبِ غم
زندگی      مختصر      نہیں      ہوتی

کتنی  پابندِ  وضع  ہے  شبِ  غم
کبھی غیروں کے گھر نہیں ہوتی

کتنی سیدھی ہے راہِ مُلکِ عدم
حاجتِ    راھبر    نہیں    ہوتی

سُن لیا ہوگا تُم نے حالِ مریض
اب   دَوا   کارگر   نہیں   ہوتی

عرش ہلتا ہے میری آہوں سے
لیکن  اُن  کو خبر نہیں ہوتی

*اُستاد قمرؔ جلالوی*

ماخذ:-رَشکِ قمرؔ ص ۵۷

وہ نہ آئیں گے کبھی دیکھ کے کالے بادل دو گھڑی کے لیے، اللہ ! ہٹا لے بادل

*استاد قمرجلالوی*

وہ نہ آئیں گے کبھی دیکھ کے کالے بادل
دو گھڑی کے لیے، اللہ ! ہٹا لے بادل

آج یوں جُھوم کے کچُھ آگئے کالے بادل
سارے میخانوں کے کھلوا گئے تالے بادل

آسماں صاف شبِ وصل سحر تک نہ ہُوا
اُس نے ہر چند دُعا مانگ کے ٹالے بادل

بال کھولے ہوئے، یوں سیر سرِ بام نہ کر
تیری زُلفوں کی سیاہی نہ اُڑا لے بادل

وقتِ رُخصت عجب انداز سے اُن کا کہنا
پھر دُعا کل کی طرح مانگ، بُلا لے بادل

میں تو برسات میں بھی چاندنی صدقے کردُوں
اے قمر! کیا کرُوں جب مجھ کو چُھپا لے بادل