Jo Roz Badalte Hain Mayar Muhabbat K,

جو روز بدلتے ہیں معیار محبت کے

وہ لوگ نہیں ہوتے حقدار محبت کے

۔

اس سال تمہارے بن رمضان گزارا ہے

روزے بھی ہوئے مشکل افطار محبت کے 

۔

یہ تاج محل دیکھو الفت کی نشانی ہے

ایسے ہی ہزاروں ہیں شہکار محبت کے 

۔

اب ہیر بھی جھوٹی ہے، رانجھا بھی فریبی ہے

رہتے ہیں تعقب میں فنکار محبت کے

۔

اظہارِ محبت بھی تم نے ہی کیا تھا نا؟

تم نے ہی کیے رستے دشوار محبت کے

۔

ہولی بھی میں کھیلا ہوں، عیدیں بھی منائی ہیں

ہوتے ہیں سبھی جائز تہوار محبت کے 

۔

اب دل بھی ہمارا تو سنسان سا جنگل ہے

باقی ہیں مگر اس میں آثار محبت کے

۔

لیلٰی کے بھی قصے ہیں، مجنوں بھی سلامت ہے

مر کے بھی نہیں مرتے کردار محبت کے

۔

بالوں میں سفیدی بھی یوں ہی تو نہیں اتری

سو رنج اٹھائے ہیں سرکار محبت کے

۔

وہ لوگ نہیں کرتے الفت میں کمی ہرگز

جو وزن میں کہتے ہیں اشعار محبت کے

۔

ہر مرض زمانے سے ہو جائے اگر رخصت

دنیا میں رہیں گے پر بیمار محبت کے

۔

تم ہاتھ چھڑاؤ تو وہ ہاتھ چھڑا لیں گے

کچھ لوگ تو ہوتے ہیں خوددار محبت کے

۔

تم نے تو گزاری ہے اک رات جدائی کی 

پر ہم نے اٹھائے ہیں آزار محبت کے

۔

یہ درد مرے سر کا جاتا ہی نہیں مرشد

الفاظ تو دم کر دو، دو چار محبت کے